စာအုပ်ခြုံငုံသုံးသပ်ချက် - ယောနသံ သို့မဟုတ် စတင်ခြင်း

(Daily Express သတင်းဌာန ၏ စာအုပ်သုံးသပ်ချက်ဝေဖန်ရေး ဆောင်းပါးကို ပြန်လည် ဖော်ပြခြင်း ဖြစ်ပါသည်။)

စာအုပ်မျက်နှာဖုံးက Lone Sail ဂိမ်းမှ ဇာတ်ကောင် နှင့် ၄င်း၏ ယာဥ် ပုံ ဖြစ်သည်။  ဂိမ်းဇာတ်ကောင်သည် အဆိုပါ ယာဥ်တစ်စီးကို ပြုပြင် လောင်စာဖြည့်ရင်း မျှော်လင့်ချက် အပြည့်ဖြင့် ခရီးသွားသော ဇာတ်လမ်း။ ယောနသံ ခရီးကလည်း မျှော်လင့်ချက်ဖြင့် ခရီးသွားနေသည်ဟု စာရေးသူ မိုးနတ်က ဆိုလိုဟန် ရှိသည်။

နိုင်ငံရေးခေါင်းဆောင် အတော်များများသည် အနားယူပြီးနောက် စာရေးလေ့ ရှိ၏။ ၄င်းတို့ လုပ်ခဲ့သမျှကို ဖြေရှင်းလိုကြခြင်း ဖြစ်သည်။ ယခု မိုးနတ်မင်းသားကမူ အနားမယူမီပင် စာအုပ်တစ်အုပ် ရေးသားလာသည်။

ယခုစာအုပ်မှာ မိုးနတ် ၏ ပြည့်စုံသော စာအုပ် တစ်အုပ်ဟု ဆိုလိုရမည်ကဲ့သို့ ရှိနေသည်။ သုတေသန ကျမ်းတအုပ်ကဲ့သို့လည်း ဖြစ်နေသည်။  စာရေးသူက ၄င်းအုပ်ချုပ်ရာ ယောနသံ ဒေသ၏ ကိုယ်ပိုင်အုပ်ချုပ်ခွင့်နှင့် တည်ငြိမ်ရေးကို ဦးတည်ကာ နိုင်ငံရေး၊ စစ်ရေးနှင့် လူမှုရေးစိန်ခေါ်မှုများကို စူးစမ်းလေ့လာထားသည်။ 

လက်တွေ့အမြင်များကို အခြေခံထားပြီး တအုပ်လုံးကို ကိုယ်တိုင်ရေးသည်ဟု လည်း ဝန်ခံထားသော ယခုစာအုပ်တွင် ပြင်ပနှင့်ပြည်တွင်းဖိအားများအောက်တွင် ကြုံတွေ့ခဲ့ရသော ဒေသတွင်း ရုန်းကန်မှုများ၏ အသေးစိတ်သမိုင်းမှတ်တမ်းကို ဖော်ပြပေးထားသည်။

ယောနသံ ဒေသ၏ ထိလွယ်ခိုက်လွယ်သော အစောဆုံးနေ့ရက်များနှင့်အတူ  အိမ်နီးချင်းဒေသများ၊ မြန်မာနိုင်ငံအလယ်ပိုင်း ဒေသ အစိုးရများတို့နှင့် ဖြစ်ခဲ့သော ပဋိပက္ခများနှင့် သံတမန်ရေးတင်းမာမှုများကို ပြန်ပြောပြထားသည်။

ဤစာအုပ်တွင် ဒေသတွင်း ကိုယ်ပိုင်အုပ်ချုပ်မှု ထူထောင်ရေး၊ စစ်ရေး ဆက်ဆံမှုများနှင့် စီးပွားရေး အခြေခံ အဆောက်အအုံ ဖွံ့ဖြိုးတိုးတက်ရေး အပါအဝင် အဓိက နိုင်ငံရေး မှတ်တိုင်များကို အလေးပေးဖော်ပြထားသည်။  အထူးသဖြင့်၊ အမျိုးသားကာကွယ်ရေးတပ်မတော် (NDA) သည် ဒေသတွင်းလုံခြုံရေးကို ကာကွယ်ရန်နှင့် ၎င်း၏ အချုပ်အခြာအာဏာကို ကာကွယ်ရာတွင် အဓိကအခန်းကဏ္ဍမှ ပါဝင်ခဲ့ပုံကို စာရေးသူက အလေးပေးဖော်ပြထားသည်ကိုလည်း တွေ့မြင်ရသည်။

မိုးနတ်ကို အချို့က သက်ဦးဆံပိုင် တဦး၊ စစ်ဘုရင်တစ်ဦး ဟု ဆိုကြ၏။ ဤ စာအုပ်တွင်သူက ခေါင်းဆောင်တစ်ဦးအဖြစ် သူ၏ကိုယ်ပိုင်အတွေ့အကြုံများကို ဝေမျှပေးထားပြန်သည်။

စည်းလုံးညီညွတ်မှုနှင့် ကိုယ်ပိုင်အုပ်ချုပ်ခွင့်ဆီသို့ ဦးတည်သွားသော ယောနသံ ၏ခရီးကို ပုံဖော်ပေးသည့် ဆုံးဖြတ်ချက်များနှင့် မူဝါဒများကို သူက ရှင်းပြသည်။  အခန်းတစ်ခန်းချင်းစီသည် ဒေသကို အသိအမှတ်ပြုရန် သံတမန်ရေး တိုက်ပွဲ၊ အာဏာခွဲဝေမှုအတွက် စေ့စပ်ညှိနှိုင်းမှုများနှင့် ပဋိပက္ခများဆက်လက်ဖြစ်ပွားနေသော်လည်း ရေရှည်တည်တံ့သောစီးပွားရေးတိုးတက်မှုကို ထူထောင်ရန် ကြိုးပမ်းခဲ့သောအဆင့်များကို အလေးပေးထားသည်။

စာအုပ်တွင် အပိုင် ငါးပိုင်းကို တွေ့မြင်ရသည်။
ကိုယ်ပိုင်အုပ်ချုပ်ခွင့်နှင့် အုပ်ချုပ်မှု- ဤစာအုပ်သည် ဗဟိုအစိုးရနှင့် ပူးပေါင်းဆောင်ရွက်မှုကို ထိန်းသိမ်းထားသော ယောနသံဒေသကို ထိန်းညှိထားသည့် ဥပဒေနှင့် နိုင်ငံရေးမူဘောင်များကို ထည့်သွင်းထားသည်။

စစ်ရေးဗျူဟာနှင့် ကာကွယ်ရေး- တည်ငြိမ်မှုကို ထိန်းသိမ်းရာတွင် ကာကွယ်ရေး ၊တပ်မတော်၏ အရေးပါသော အခန်းကဏ္ဍကို စူးစမ်းလေ့လာပြီး ပြင်ပခြိမ်းခြောက်မှုများနှင့် ရင်ဆိုင်ရချိန်တွင် ကာကွယ်ရေး စွမ်းရည်ကို ခေတ်မီအောင် လုပ်ဆောင်ရန် ဒေသ၏ ကြိုးပမ်းမှုများကို တို့ထိထားသည်။

စီးပွားရေးဖွံ့ဖြိုးတိုးတက်မှု- စာရေးသူသည် အခြေခံအဆောက်အအုံ၊ စိုက်ပျိုးရေးနှင့် ကုန်သွယ်မှုဆိုင်ရာ အစပျိုးမှုများအပါအဝင် ဒေသတွင်းတိုးတက်မှုကို လှုံ့ဆော်ရန်အတွက် အကောင်အထည်ဖော်ဆောင်ရွက်ခဲ့သော စီးပွားရေးမူဝါဒများကို ရှင်းပြသည်။

ယဉ်ကျေးမှု နှင့် စည်းလုံးညီညွတ်မှု- စာအုပ်တစ်အုပ်လုံးတွင ယဉ်ကျေးမှုဆိုင်ရာ ဝိသေသလက္ခဏာများနှင့် လူမှုရေးစည်းလုံးညီညွတ်မှု၏ အရေးပါမှုကို အလေးပေးဖော်ပြထားသည်။

နိုင်ငံတကာဆက်ဆံရေးတွင် စိန်ခေါ်မှုများ- ဤစာအုပ်သည် ဒေသတွင်း၏ အချုပ်အခြာအာဏာကို အလျှော့မပေးဘဲ ပြင်ပမဟာမိတ်များ ဟန်ချက်ညီစေရန်  သံတမန်ရေးရာ ကြိုးပမ်းမှုများနှင့် နိုင်ငံတကာအဖွဲ့အစည်းများနှင့် မိတ်ဖက်ပြုထားသော အခြေအနေကို ရှင်းလင်းထားသည်။

ဤ စာအုပ်သည်နိုင်ငံရေးခေါင်းဆောင်များ၊ သမိုင်းပညာရှင်များ သာမက ပဋိပက္ခဇုန်များရှိ ဒေသဆိုင်ရာ ကိုယ်ပိုင်အုပ်ချုပ်ခွင့်၏ ရှုပ်ထွေးပွေလီသော ဒိုင်းနမစ်များကို  စိတ်ဝင်စားသူများအတွက် အဖိုးတန်သင်ခန်းစာများ ပေးလိမ့်မည် ဖြစ်သည်။

စာအုပ်တွင် ယောနသံဒေသ  အနာဂတ်အတွက် ရှေ့ပြေးမျှော်မှန်းချက်များဖြင့် နိဂုံးချုပ်ထားပြီး ငြိမ်းချမ်းရေးတည်ဆောက်မှုနှင့် စီးပွားရေးဖွံ့ဖြိုးတိုးတက်မှု ဆက်လက်ရရှိရန် တိုက်တွန်းထားသည်။